Partia Socialiste vendosi të heqë nga rendi i ditës në seancën e kësaj të marte propozimin e bërë prej saj për zhbërjen e formulës së barazisë mes opozitës dhe mazhorancës në Komisionin e Reformës Territoriale.
"Darka ka habere të mira. Bazuar në nenin 49, pika 1 e rregullores, kërkoj një ndryshim në rendin e ditës për të mos u shqyrtuar projektvendimi për ngritjen e Komisionit të Posaçëm Administrative Territoriale, në këtë seancë, me shpresën që puna do të rifillojë", - tha kreu i grupit parlamentar socialist Taulant Balla.
Në krahun tjetër deputeti dhe nënkryetari i Partisë Demokratike, Luçiano Boçi, akuzoi socialistët se vetëm heqja nga rendi i ditës dhe jo tërheqja e projektvendimit është një formë presioni ndaj opozitës.
“Kërkesa jonë ka qenë e qartë, pa ekuivok, jo të mos shqyrtohet, sepse mosshqyrtimi ka brenda shqyrtimin, por kërkesa jonë ka qenë tërheqja. Tërheqja tregon vullnetin, shtyrja nuk tregon asgjë. Nuk kemi pas kundërshtuar”, - tha Boçi.
Në seancë, PD pretendoi se nuk i ka bojkotuar mbledhjet, por se ato janë thirrur nga Arbian Mazniku pa konsensus.
“Nuk ka pasur mbledhje të vlefshme, mbledhja thirret në konsultim me kryesinë e komisionit”, - tha bashkëkryetari Luçiano Boçi. Mazhoranca i vuri ultimatum opozitës që ose të merrte pjesë në komision ose do të ndryshonte formulën dhe do të merrte shumicën. ©LAPSI.al
