Pas rezultatit të dobët që mori në zgjedhjet e fundit në Kosovë, kryetari i Lidhjes Demokratike të Kosovës, Lumir Abdixhiku ka dalë me një reagim kundër gazetarëve që i akuzon për të shitur dhe që i lidh me aferën e aeroportit të Vlorës, projekti i rëndësishëm infrastrukturor që për momentin është i bllokuar.
Abdixhiku i quan këta gazetarë "mercenarë", të cilët sipas tij rrotullohen rreth krimit. Madje gazetarët që shiten e blihen, sipas Abdixhikut rrotullohen aq larg "sa mbërrinë dhe Aeroportin e Vlorës".
Skandali i bllokimit të Aeroportit të Vlorës/ Çfarë po luhet në prapaskenë
Për kë gazetarë flet Abdixhiku? Cilët janë këta "mercenarë" që sipas tij kanë mbërritur deri në Aeroportin e Vlorës? Kushdo qofshin, përfshirja e gazetarëve që përmend Abdixhiku në këtë çështje, tregon se afera shkon përtej biznesmenit Valon Ademi, pas të cilit dyshohet se fshihen interesa të tjera.
Mesazhi i plotë i Lumir Abdixhikut në rrjetet sociale:
“Mercenarët u lajmëruan vet. Pa i përmendur. Siç thotë populli, u vetëlajmëruan ata me mizë mbas veshi. Dhe në lajmërimin e tyre, treguan se si mendojnë. Mendojnë se të gjithë sillen rreth krimit, sepse aty rrotullohen vet. Dikush rrotullohet aq larg sa mbërrinë dhe Aeroportin e Vlorës. Mendojnë se të gjithë shiten, sepse vetë janë për shitje. Mendojnë se të gjithë frikësohen, sepse vetë jetojnë nga frika. Ky është botëkuptimi i tyre. Nuk do ta lejojmë këtë botëkuptim të shtrihet në LDK as si fjalë, as si mendim, edhe më pak si ndikim”
