Emiljano Shullazi do të pyetet në burgun 313 për vrasjen e mikut të tij Gilmando Dani në Rinas. Pyetja e tij do bëhet si person që mund të ketë dijeni mbi persona që kanë qenë të interesuar për ekzekutimin mafioz, ku i vrarë mbeti gjithashtu edhe Muçi Shaljani që drejtonte automjetin.
Teksa policia dhe prokuroria nuk kanë ende autor për këtë ngjarje, marrja në pyetje e Shullazit shihet si një mundësi për të shkuar tek këta të fundit nëse Shullazi mund të jap ndonjë indicie të mundshme. Megjithatë, Emiljano Shullazi mund të shfrytëzojë të drejtën e refuzimit për tu përgjigjur, ç’ka nuk përjashtohet si mundësi, dhe në këtë mënyrë, veprimi i organit hetues do ishte në thelb vetëm procedural.
Gilmando Dani u lirua nga qelia në 2024, pasi ishte dënuar më herët si pjesë e grupit të Shullazit, teksa ditën e ngjarjes, kur po kthehej nga Spanja u ekzekutua bashkë me mikun e tij një ish-efektiv policie Muçi Shaljanin, në një nga zonat më të sigurta të vendit. Burime nga Prokuroria e Tiranës konfirmuan se ndryshe nga sa mund të jetë vepruar në raste të mëparshme, pas dyshimeve se në ngjarje të tilla janë angazhuar për eliminime persona si grup i strukturuar kriminal dhe që dosjet kanë shkuar zakonisht në SPAK për kompetencë, në rastin konkret, është Prokuroria e Tiranës që e mban dosjen.
Burime pranë saj thanë për Syri Tv, se janë një mori subjektesh që janë pyetur dhe do pyeten ditët në vijim si persona në dijeni, dhe se ka indicia të forta për zbulueshmërinë e autorëve. /Syri.net
