Kryetari i Partisë Demokratike, Sali Berisha është paraqitur në Prokurorinë e Posaçme në zbatim të masës së sigurisë “detyrim paraqitje”.
Në mbështetje të Berishës jashtë ambienteve të SPAK kanë dalë edhe disa deputetë që kanë marrë mandatin në zgjedhjet e 11 majit, por edhe mbështetës demokratë. Në dalje, ai foli për mediat, duke treguar edhe mesazhin qe i la kreut te SPAK, Altin Dumani.
"Qëndrimi mbrojtës ndaj krimit elektoral i Altin Dumanit, përbën një krim të rëndë antikushtetues në shërbim të narkoshtetit dhe kreut të tij, Edi Rama. Kjo është deklarata që unë i lashë kreut të Skapit", tha Berisha.
Berisha deklaroi se gjatë fushatës zgjedhore PD ka dorëzuar më shumë se 15 padi për shkelje të dyshuara zgjedhore. Sipas tij, këto padi nuk kanë pasur asnjë rezultat konkret për shkak të një “amnistie të krimit elektoral” që është orkestruar nga drejtues të drejtësisë dhe nga vetë kryeministri Edi Rama.
