Qindra protestues dolën në rrugë në zonat e krishtera të Damaskut pas djegies së një peme të Krishtlindjes në qytetin Hama në Sirinë qendrore. Demonstruesit brohoritën parulla për mbrojtjen e të drejtave të krishterëve dhe marshuan drejt selisë së Patriarkanës Ortodokse.
“Nëse nuk na lejohet të jetojmë besimin tonë të krishterë në vendin tonë, siç kemi bërë më parë, atëherë nuk i përkasim më këtij vendi” - tha një protestues. Protestat shpërthyen pas publikimit të një videoje që tregonte luftëtarët me kapuç duke i vënë zjarrin një peme të Krishtlindjes në qytetin me shumicë të krishterë të Suqaylabiyah.
Sipas Observatorit Sirian për të Drejtat e Njeriut, luftëtarët ishin të huaj nga grupi islamik Ansar al-Tawhid. Një udhëheqës fetar nga Hayat Tahrir al-Sham (HTS) që qeveris vendin premtoi dënim për autorët.
“Pema do të restaurohet dhe do të ndriçohet deri nesër në mëngjes” - tha ai.
Autoritetet e reja siriane kanë njoftuar se kanë arritur një marrëveshje me grupet rebele për shpërbërjen dhe integrimin e tyre në forcat e rregullta të mbrojtjes.
"Takimi i krerëve të grupeve" me udhëheqësin e ri sirian Abu Mohammad al-Jolani (Ahmed al-Sharaa) "përfundoi me një marrëveshje për shpërbërjen e të gjitha grupeve dhe integrimin e tyre nën kontrollin e Ministrisë së Mbrojtjes". - thuhet në një shënim të publikuar nga media shtetërore. ©LAPSI.al
