Mediat kanë publikuar këtë të mërkurë foton e personit që vendosi lëndën plasëse tek një lokal në Lungomare në Vlorë 3 ditë më parë. Personi është veshur me rroba të zeza dhe kapuç për t’ju shmangur kamerave të sigurisë. TCH që citon burime nga policia raporton se janë ndaluar dy persona të dyshuar.
Sipas të njëjtave burime, personat e ndaluar nuk kanë pranuar të flasin përpara grupit hetimor. Nga shpërthimi u dëmtua fasada e lokalit "The Boss". Policia e Vlorës ka marrë kamerat e sigurisë së biznesit ku u vendos lënda plasëse por dhe kamera të tjera ku dyshohet se ka ikur autori.
"Jemi duke punuar" shprehen burime brenda policisë së Vlorës. Janë marrë në pyetje pronarët (dy vëllezër ) si dhe nëna e tyre, pasi lokali ishte në emrin e saj. Po hetohet edhe për hakmarrje të mundshme, pasi lokali ka qenë në pronësi të Bledar Birçaj, 38 vjeçar i cili është ekzekutuar në muajin maj të vitit 2021.
Në janar të 2011, Birçaj u arrestua në Vlorë si i dyshuar për vrasje, duke iu vendosur masa e arrestit me burg me afat 45 ditë. Në prill masa ndaj tij ndryshoi nga Gjykata e Vlorës nga “arrest në burg” me masën e sigurimit “detyrim paraqitje në policinë gjyqësore” dhe masën detyruese “ndalim të daljes jashtë shtetit” deri në përfundim të hetimeve. Por në korrik 2011 u vendos pushimi i hetimit penal duke u lënë i lirë. ©LAPSI.al
