Një ngjarje kriminale është zbardhur në Durrës, ku një i ri ka shtyrë nga ura shokun e tij duke e hedhur në një kanal të ujërave të zeza. Autori dyshuar i krimit është identifikuar si shtetasi Majlind Habibi, 35 vjeç ndërsa viktima është 33-vjeçari Branko Shkoza.
33-vjeçari, banues në lagjen nr. 5 në Durrës, është denoncuar i zhdukur nga i ati më 4 dhjetor. Babai i viktimës ka deklaruar se i riu prej datës 2 dhjetor nuk ishte kthyer në shtëpi, ndërsa trupi i pajetë u gjet në kanal vetëm një ditë pas denoncimit për zhdukjen e tij. Më 5 dhjetor, trupi i Branko Shkozës u gjet në një kanal të ujërave të zeza.
Sipas policisë, nga këqyrja e trupit të viktimës nuk u konstatuan shenja dhune, por nga këqyrja e vendit të ngjarjes dhe veprimeve të tjera hetimore, grupi hetimor krijoi dyshime se ngjarja nuk ishte aksidentale.
“Në vijim të veprimeve të thelluara hetimore u dokumentua dhe me prova shkencore se shtetasi M. H., 35 vjeç, banues në lagjen nr. 15 Durrës, më datë 02.12.2024, pas një konflikti për motive të dobëta, ka shtyrë duke e hedhur nga një urë në kanalin e ujërave të zeza shtetasin B. Sh, i cili si pasojë e rrëzimit ka humbur jetën”, raportuan uniformat blu.
Pas arrestimit, autori i dyshuar ka pretenduar se viktima i kishte ngacmuar të shoqen dhe se në sherr e sipër e ka shtyrë duke e hedhur në kanal ku më pas u gjet pajetë. ©LAPSI.al
