Kryetari i PD-së, Sali Berisha ka folur për masat e sigurisë ndaj dy gazetarëve Artan Hoxha dhe Elton Qyno nga SPAK. Në një lidhje nga banesa e tij me emisionin “Të paekspozuarit”, Berisha u pyet se përse sulmoi Artan Hoxhën dhe mbrojti gazetarin Elton Qyno.
“Qëndrimet e mia bazohen në dokumentet që unë disponoj. Në dokumentet e deritanishme, Elton Qyno, i pari gazetar i rrëmbyer nga organizata kriminale, SPAK-u i partisë, nuk kam parë në asnjë rast në asnjë vend, lidhje të tij me krimin.
Elton Qyno, e vërteta është që ka publikuar në shërbim të madh të publikut, dokumenta të cilat implikojnë direkt Edi Ramën dhe ky ka qenë një guxim i merituar. Elton Qyno, në regjistrimet që ka publikuar, ka dhënë në njëfarë mënyrë edhe çelësin për të kuptuar vrasjet shtetërore dhe në çdo rrethanë rrëmbimi i tij ishte një akt anti-kushtetues dhe banditesk. Ju garantoj se dokumentin e parë që do të kisha që faktonte kompromentimin e tij nuk do të shprehesha në atë mënyrë.
Vijmë te gazetari tjetër... Nëse lexon Metamorfozën dhe dosje të tjera, ai është paguar nga Bajri. Ka kryer detyra të ngarkuara nga Bajri. Janë në dosje. Janë të transkriptuara. Lidhur me bandën e Elbasanit, lidhjet janë shumë të vërteta por nuk janë kurrë më shumë se lidhjet e Taulant Ballës me bandën e Elbasanit. Asnjëri prej tyre që është arrestuar. Sot për bandën e Suel Çelës, nuk janë as një e dhjeta e lidhjeve të Taulant Ballës me bandën e Elbasanit dhe bandat e tjera.
Për ta mbyllur, ishte një djalë i ri 23 vjeç që nuk është më, sepse një dorë e zezë i dha një plumb pas veshi. Ky djalë i ri i një familje të nderuar në Devoll, u ekzekutua me plumb pas veshi sepse kishte denoncuar tek gazetari që po flasim, parcelat e kanabisit, drejtorit të policisë. Kjo vrasje makabër nuk u hetua ndonjëherë” – tha Berisha. ©LAPSI.al
