Humbja e rëndë në shtëpi kundër Stuttgart e komplikon rrugën e Juventus dhe teknikut Thiago Motta në Champions League 2024-2025. Me formulën e re me një grup të vetëm, objektivi kryesor i klubeve të mëdha është të arrijnë ndër tetë ekipet e para në renditje, për t’u kualifikuar direkt në fazën e 1/8-ave pa kaluar nga play-off. Një objektiv që, pas fitoreve ndaj PSV dhe Leipzig, dukej i arritshëm për bardhezinjtë, por humbja e papritur ndaj Stuttgart e ka vënë seriozisht në pikëpyetje.
Stuttgart ishte një nga skuadrat e vazos së katërt (ato që teorikisht duhet të jenë më të lehta për t’u mposhtur) në shortin që i ra Juventus. Bardhezinjtë, tani, do të përballen me një kalendar shumë më të vështirë se sa ishte perceptuar fillimisht.
Lexo më tej:
Video/ Real trondit Dortmund: Perin pret penalltinë, por Juventus thyhet në fund
Në tre ndeshjet e ardhshme, skuadra e Thiago Motta do të luajë dy transferta kundër surprizave të mëdha të këtij sezoni në Champions League, Lille, që në shtëpi mposhti Real Madrid, dhe Aston Villa, që, pas tre ndeshjeve, kryeson grupin me pikë të plota. Më pas, do të presin në Stadium një nga favoritët për të fituar, Manchester City dhe teknikun Pep Guardiola.
PARASHIKIMET FRIKËSUESE
Rruga për Juventus nuk duket aspak e lehtë. Edhe pse mbetet në garë për të kaluar në fazën tjetër (do t’i mjaftojë të renditet ndër 24 skuadrat e para për të mos u eliminuar), për të mbajtur gjallë shanset për të hyrë ndër tetë ekipet e para dhe për të siguruar kalimin direkt në fazën e 1/8-ave, duhet të bëjë një paraqitje të jashtëzakonshme në ndeshjet e mbetura.
Pas humbjes me Stuttgart, simulimet e bazuara në 10 mijë parashikime e vendosin Juventus në vendin e 17-të në renditje, me vetëm 18% shanse për t’u renditur në tetë vendet e para të grupit të vetëm.
