"Nuk jam mësuar të gjykoj paraardhësit. Duhet të punojmë të rrisim intesitetin dhe presingun. Janë ditë shumë të shkurtra, shumë problem deri në ndeshjet e Kombëtares. Djemtë dhanë maksimumin, luajtën me shpirt. Në qoftë se do të shënonim do ta menaxhonim lojën. Pjesa e dytë lë shumë për të dëshiruar". Një koment i shpejtë dhe konçiz i teknikut Edi Martini me situatën në të cilën ndodhet Teuta. 0-0 me Kukësin nuk ka si ta lërë të kënaqur teknikun shkodran, të rikthyer për herë të pestë në pankinën durrsake: "Na duheshin 3 pikë sot, për të qenë më të qetë në ndeshjet e tjera. Luajmë ndaj 2 kundërshtarëve shumë të fortë. Kjo s’do të thotë, që atë që nuk morëm sot, mos e marrim ndaj Partizanit dhe Egnatias. Djemtë janë me mentalitet fituesi. Gradualisht do të çohemi edhe mendërisht, për ta kaluar këtë malore".
Martini sidoqoftë 'qëllon' lart. Edhe pse nuk mundi dot vendin e fundit, shkodrani sheh nga Final Four: "Unë përpara ndeshjes kam biseduar që formati është me 4 ekipe. Kampionati sapo ka filluar, normalisht do të pretendojmë të futemi në katërshe. Prandaj edhe pikët ishin shumë të rëndësishme sot. Duhet të luftojmë dhe të mendojmë për vendin e katërt pse jo. Janë jashtë roleve, si Gjumsi si Fili. Një skemë tjetër nuk është kollaj të përvetësohet për 2 ditë. Shumë shpejt të gjithë do të ambientohen dhe do të bëjnë rolet. Në përgjithësi jam i kënaqur me djemtë”, u shpreh Edi Martini.
Lexo më tej: Video/ Teuta nuk mund dot as vendin e fundit: 0-0 me Kukësin, Martini ka shumë punë për të bërë
NICA: PO DUKEMI SI SKUADËR
"Ekipi ka filluar të marr një formë skuadre në veprime. Por ajo që më shqetëson është që duhet të jemi më të qartë taktikisht e të përmirësohemi". Stavri Nica është i kënaqur me barazimin 0-0 në Niko Dovana. Rezultati i dytë pozitiv radhazi për Kukësin, që tashmë i ka lënë vendin e fundit Dinamos, që duhet ende të luajë. Nica sidoqoftë ka rezerva mbi mënyrën e lojës së të tijve: "Ka probleme në marrje pozicioni, në zotërimin e topit, nguten, nuk janë futur ende në rrjedhën e duhur që më pëlqen mua të kampionatit. Ndeshje pas ndeshje po tregojmë që krijohet stabilitet e sigurie, ndaj çdo kundërshtari".
