Partizani fiton, ashtu si duhej për nga statura dhe potenciali, por e bën pa shkëlqim, pa raste e me një gol të falur nga gafa e portierit Campillos. Të kuqtë dalin nga transferta e Andorras me një 0-1 premtuese në vajtjen e raundit të dytë të Conference League. Atletic Escaldes nuk bëri asgjë për të rrezikuan kundërshtarin, por gaboi në fillimin e pjesës së dytë kur Mba vendosi ndeshjen.
Zekic kishte ndryshuar vetëm me Sembene në pankinë, për kroatin e sapoardhur Kocijan. Përpara, Grezda kishte marrë vendin e brazilianit Da Silva. Rezultati, nje performancë shumë më e dobët se ajo e humbur kundër BATE Borisov. Të paktën atë ndeshje Partizani e dominoi me raste e intensitet. Ndërsa këtë herë Campillos ishte gati spektator. Kombinimet mungonin, pavarësisht se vendasit kishin ndryshuar trajner para ndeshjes e kishin larguar tetë titullarë nga skuadra.
Lexo më tej: Shorti në Nyon i shtron rrugën Partizanit, jo dhe aq Tiranës: në raundin e tretë, të kuqtë gjejnë rivalë modestë
Goli i vetëm i sfidës u shënua nga Christian Mba në minutën e 53’. Më shumë se meritë e një aksioni të rrjedhshëm ishte këmbëngulja e nigerianit dhe gafa amatoreske e Campillos që sollën kapitullimin e Atletic Escaldes. Mba i rrëmbeu topin portierit dhe me portën boish shënoi golin e fitores. Të kuqtë shpërdoruan raste të tjera pastaj për të mbyllur cështjen e kualifikimit. Sulmuesit e Zekic megjithatë nuk arritën të finalizonin. Tashmë Partizani do të presë javën tjetër kundërshtarët në shtëpi, me një gol avantazh e një këmbë në raundin e tretë.
[video width="688" height="380" mp4="https://cdnimpuls.com/lapsi.al/wp-content/uploads/2023/07/mba.mp4"][/video]
