Gjysmë ore apo diçka më pak: kaq zgjati takimi, i cili u zhvillua pasditen e së hënës në një hotel në qendër të Milanos. Numri 1 i Milan, Gerry Cardinale dhe menaxheri i kuqezinjve, Paolo Maldini ndanë rrugët aty. Asnjë përballje mes të dyve, por një komunikim i thatë i përfundimit të marrëdhënies nga Red Bird. Ish-kapiteni i kuqezinjve bazohet në një vizion të ndryshëm të strategjive të klubit. Kështu, Maldini kërkoi një përforcim të skuadrës me emra 'garantues' për të qenë konkurrues në Itali dhe në Evropë. Cardinale nga ana e tij fokusohet më shumë te talentet që duhen rritur në shtëpi, sidomos pas zhgënjimit në merkato (De Ketelaere dhe Origi). Maldini, i cili i mori rolin e drejtorit teknik nga qershori 2019, largohet kështu përfundimisht. Bashkë me të edhe krahu i tij i djathtë Frederic Massara.
Drejtori teknik dhe drejtori sportiv kishin një kontratë që skadon në qershor 2024. Mungon vetëm divorci zyrtar nga skuadra pas fitimit të një titulli vitin e kaluar, gjysmëfinales së Champions League dhe kualifikimit të tretë radhazi në Kupën më prestigjioze të Europës. Nga ana tjetër, është konfirmuar besimi tek Stefano Pioli, që do të qëndrojë në pankinë.
Lexo më tej:
Maldini drejt lamtumirës, mosmarrveshje të forta me Cardinale: hipoteza Tare te Milan?
Një kthesë e vërtetë brenda Milan, që disa lojtarë, nga Leao te Theo Hernandez e Maignan, e kanë marrë shumë keq. Siç raporton ‘Repubblica’, sulmuesi portugez, shumë i afërt me Maldinin, mbrëmjen e së hënës vonë ka publikuar një postim në Twitter me një emoticon duke shprehur hutim në rrjetet sociale. Referenca ndaj lajmeve të shoqërisë duket e qartë.
Si ndryshon Milani tani?
Dy figurat e Maldinit dhe Massara nuk do të zëvendësohen nga menaxherë të rinj nga jashtë. Revolucioni i kuqezinjve parashikon një rishpërndarje të roleve brenda klubit. Vullneti i Cardinale është të menaxhojë kompaninë personalisht. Ai do të jetë më i pranishëm në Milano sesa ka qenë deri tani. Më shumë kompetenca pastaj në duart e Giorgio Furlani, CEO që nga nëntori i kaluar, që do të menaxhojë merkaton. Pastaj 'promovimi' i shefit të skautingut Geoffrey Moncada, i cili do të përfshihet në strategjitë që do të ndiqen për të arritur objektivat e vendosura nga pronarët. Kështu, idea është e një Milani të besuar grupit e jo figurave individuale. Kursi i ri është gati të fillojë.
