Interi nuk po kalon një moment të mirë dhe është i pushtuar nga kritikat. Di Canio e ka me teknikun Inzaghi. Kritikat e tij i bashkohen me ato të Massimo Morattit, i cili kishte fjalë të ashpra për klubin dhe disa lojtarë. Humbja ndaj Spezia, anarkia që u pa në momentin e goditjes së penalltisë ku Lautaro dhe Lukaku kishin mosmarrëveshje se kush do ta godiste dhe hendeku i madh nga Napoli, po e vënë në shënjestër teknikun Simone Inzaghi.
Në takimin e zakonshëm në Sky Calcio Club, Paolo Di Canio ka folur për momentin e Inter dhe të Simone Inzaghi. Ish-lojtari i Lazios nuk arrin t'i kuptojë dot kaq shumë vështirësi: “Nuk i kuptoj këto vështirësi jashtë shtëpisë, edhe Inzaghi duhet të bëjë modifikime. Duhet të ketë personalitet për të menaxhuar një grup të tillë, por duket se nuk mund t'i motivojë lojtarët e tij. Ai ka ndryshuar hierarkinë. Brozovic nga titullar është bërë rezervë dhe Lukaku nga titullar është bërë lojtar që t'i japë frymëmarrje Dzekos“.
Duke vazhduar analizën e tij, ai i jep një goditje të rëndë teknikut Simone Inzaghi: “Në këndvështrimin tim, nuk është një trajner i madh ai që pretendon se ka fituar Kupën e Italisë dhe Superkupën e Italisë. E kjo, vetëm për të hequr disa guralecë nga këpucët. Interi ka nevojë për një trajner me karakteristika të tjera. Ai është i mirë, por nuk ka qëndrimin dhe komunikimin e një trajneri të madh. Ai bën gabime komunikimi kur ka ende shumë ndeshje për të luajtur përpara”. Pas Morattit, edhe Di Canio sulmon zikaltrit.
