Kryeministri i Kosovës, Albin Kurti, ka reaguar në lidhje me mbledhjen e përbashkët të dy qeverive që u mbajt këtë të hënë në Prishtinë.
Përmes një postimi në Twitter, Kurti shkruan se mbledhja e tetë e dy qeverive Shqipëri-Kosovë shërbeu për të vlerësuar progresin e bërë deri tani, si dhe nënvizon se në takimin e sotëm u nënshkruan marrëveshje të reja të rëndësishme, në në fushën e arsimit, shëndetësisë, rinisë, energjisë, transportit, bujqësisë, si dhe heqjen e kufizimeve kufitare.
“Sot mbajtëm mbledhjen e 8-të të përbashkët të qeverisë me Shqipërinë për të vlerësuar progresin që kemi arritur dhe për të nënshkruar marrëveshje të reja në fushën e arsimit, shëndetësisë, rinisë, energjisë, transportit, bujqësisë, si dhe heqjen e kufizimeve kufitare”, shkruan Kurti.
Në një postim tjetër në Twitter Kurti shton se: “Shqiptarët sot jetojnë më mirë se kurrë. Por ne nuk duhet ta masim suksesin tonë me njëri-tjetrin, por të krahasojmë me botën. Ne kemi nevojë për më shumë unitet btë ne dhe përafrim në çështjet rajonale dhe të jashtme. Nuk ka dyshim se historia do të na gjykojë se si e përdorim këtë mundësi historike”.
