Njëmbëdhjetë foshnja kanë vdekur si pasojë e zjarrit në qytetin Tivauan në Senegal. Zjarri ka shpërthyer në departamentin e maternitetit dhe vetëm tri foshnje kanë arritur të shpëtohen nga zjarri, kanë thënë autoritetet lokale.
Flakët janë përhapur shumë shpejt dhe shërbimet e emergjencës janë ende në vendin e ngjarjes. Mësohet se spitali është inauguruar së fundi, ka raportuar agjencia e lajmeve AFP, duke cituar raportimet lokale.
Presidenti i shtetit, Macky Sall u ka shprehur ngushëllime nënave dhe familjarëve. Ky incident ka nxitur një valë kritikash në rrjetet sociale rreth kujdesit të shtetit ndaj sektorit të shëndetësisë. Një incident i ngjashëm ka ndodhur vitin e kaluar në Senegal, pasi katër foshnja kanë vdekur si pasojë e zjarrit në një spital materniteti.
