Më shumë se gjysma e shqiptarëve (50,7%) nuk shkojnë asnjëherë në institucione të besimeve fetare si xhami, kishë apo teqe. Pjesa më e madhe e atyre që i vizitojnë këto institucione fetare (27%), shkojnë vetëm në ditët e festave të besimit fetar të cilit i përkasin.
Pjesa tjetër e qytetarëve i vizitojnë xhamitë, kishat dhe teqetë 1 herë në muaj (5,9%), një herë në javë (7,9%), ose më shumë se një herë në javë (5,4%).
Bazuar në censusin e vitit 2011 kryer nga Instituti i Statistikave, thuajse 80% e shqiptarëve deklarojnë se i përkasin një besimi fetar.
Pjesa dërrmuese e shqiptarëve (57,8%) mendojnë se janë po aq besimtarë sa edhe prindërit e tyre. Një në pesë qytetarë shqiptarë (21,8%) mendojnë se besojnë më pak se prindërit në fe. Më pak janë ata (19%) që besojnë më shumë se prindërit.
Pjesa më e madhe e shqiptarëve (73,9%) besojnë sot po aq sa 10 vjet më parë. Thuajse një në pesë shqiptarë (18,7%) deklarojnë se besojnë më shumë sot, sesa 10 vjet më parë dhe shumë pak janë ata (6,3%) që besimin e kanë humbur gjatë dekadës së fundit.
85% e shqiptarëve ndajnë të njëjtin besim fetar me familjen e tyre. Vetëm një në dhjetë qytetarë shqiptarë besojnë në një fe tjetër nga ajo e familjes së tyre.
Fenomeni është më i përhapur në zonat rurale sesa ato urbane, edhe pse jo me diferencë të madhe.
Nëse shqiptarët i ndajmë sipas zonës ku jetojnë, rezultati tregon se familjet që trashëgojnë besimin fetar janë më të shumta në veri të Shqipërisë.
Pavarësisht se shumica e qytetarëve ndajnë besimin fetar me familjen, ata i pranojnë personat me besime fetare të ndryshme nga ai i tyri.
Mbi 95% e shqiptarëve pranojnë që shoqëria, kolegët e punës apo mësuesi i fëmijëve apo mjeku i familjes të jenë i një besimi fetar të ndryshëm.
Gjetjet janë të Barometrit në Euroneës Albania, kryer nga MRB dhe DataCentrum në nivel kombëtar me 1000 intervista ballë për ballë në datat 25 prill – 7 maj. /Euronews Albania
