Një 20-vjeçar është arrestuar në Durrës, pasi dyshohet se ka plagosur vëllanë e tij.
Sipas policisë, Egzon Oruçi është konfliktuar me vëllanë, 27-vjeçarin Benard Oruçi dhe më pas e ka goditur me mjetin prerës. Ngjarja ka ndodhur në lagjen 13 të qytetit bregdetar, në zonën e Plazhit dhe shkak i sherrit dyshohet të kenë qenë motive të dobëta.
I plagosuri ndodhet në spital, jashtë rrezikut për jetën.
Nëse i riu shpallet fajtor për këtë vepër penale rrezikon dënimin me burg deri në 15 vjet. Kodi penal parashikon si rrethanë rënduese kur plagosja me dashje ndodh kundër një familjari.
