Prej ditës kur Edi Rama deklaroi se do të legalizojë kanabisin për qëllime mjekësore duke u fshehur pas procesit farsë të Këshillimit Kombëtar, qeveria i druhet tendencës së rritur për kultivim masiv të kanabisit në të gjithë vendin. Sot ministri i Brendshëm, Bledi Çuçi dhe kreu i Policisë së Shtetit mblodhën drejtuesit e policisë së qarqeve Lezhë, Shkodër e Kukës. Krahas të tjerave, porisia për vartësit e tyre ishte e prerë.
“E rëndësishme është gjithashtu të mos keqkuptohet nga askush synimi ynë për legalizim të kanabisit vetëm për qëllime mjekësore, që do të jetë një aktivitet i rregulluar me ligj të veçantë dhe i kontrolluar rreptësisht përmes kompanive që do të licencohen. Çdo formë tjetër e kultivimit të kanabisit konsiderohet aktivitet i paligjshëm e kriminal për të cilin do të ketë zero tolerancë”, thuhet në njoftimin e shpërndarë për mediat pas takimit në Lezhë.
Takime të tilla pritet të zhvillohen edhe në qarqe të tjera të vendit. Deri më tani s’ka ende një kuadër ligjor të plotë për legalizimin e kanabisit për qëllime mjekësore. Dyshimet ekzistojnë se me ketë veprim qeveria thjesht sa kërkon të ligjërojë në fakt aktivitetin e disa grupeve kriminale të lidhura me të, që më pas sic ka rezultuar edhe nga përgjimet e dosjes së Dibrës dhe Durrësit janë përdorur për të blerë vota.
Legalizimi i kanabisit mjekësor duket se ka dështuar edhe në Maqedoninë e Veriut. Mbetet për t’u parë se si do të rrjedhë ky proces në vendin tonë, i cili ka një histori fort të dhimbshme me kultivimin e kanabisit që nga Lazarati i famshëm e deri te kanabizimi i gjithë vendit gjatë qeverisjes së Edi Ramës. Pikërisht për këtë aktivitet kriminal sot është në burg ish-ministri i tij i Brendshëm, Saimir Tahiri. ©LAPSI.al
