Misteri ka rrethuar luftanijen ruse “Moskva” të mbytur pak ditë më oarë në Odesa pasi Kremlini ka publikuar një video që shfaq të mbijetuarit përfshirë edhe kapitenin, Anton Kuprin i cili u raportua i vdekur pas goditjes.
2 ditë pas sulmit, Rusia deklaroi se kreu i marinës ruse kishte takuar ekuipazhin e anijes në Sevastopol, por qindra marinarë janë ende të zhdukur. Anija u mbyt të enjten pas një zjarri dhe një shpërthimi dhe sipas Ukrainës humbi jetën i gjithë ekuipazhi i saj prej 510 marinarësh që ishte në bord.
Megjithatë fati i ekuipazhit mbetet mister edhe pse Kievi pretendon se të gjithë humbën jetën pasi Rusia tha se ekuipazhi u evakuua dhe u dërgua në portin e Sevastopolit. Ka edhe raporte se një anije turke shpëtoi më shumë se 50 marinarë.
Tashmë Ministria e Mbrojtjes e Rusisë publikoi një video 26 sekondash që tregon shefin e marinës, admiralin Nikolay Yevmenov, 60 vjeç, duke iu drejtuar oficerëve të marinës dhe marinarëve. Megjithatë nuk dihet se kur është zhvilluar takimi dhe kush ishte në të.
Një nga oficerët e pranishëm i ngjante kapitenit të rangut të parë Anton Kuprin, komandant i anijes “Moskva” për të cilin ukrainasit thanë se humbi jetën. Megjithatë në pamjet e nxjerra nga rusët ishin të dukshëm rreth 150 burra, ndërsa ekuipazhi i anijes luftarake të goditur ishte 510.
Burrat u rreshtuan në një mënyrë që të jepnin përshtypjen e një numri të madh të pranishëm gjatë parakalimit. Admirali rus u shfaq në TV duke thënë: "Ekuipazhi i kryqëzorit Moskva është në bazën kryesore, qytetin hero të Sevastopolit. Oficerët, ndërmjetësit, personeli me kontratë do të vazhdojnë shërbimin në Marinë”. TV shtetëror rus nuk ka shfaqur asnjë pamje të ekuipazhit që kthehet në shtëpi. ©LAPSI.al
