Madeleine Albright, gruaja e parë që shërbeu si Sekretare e Shtetit të SHBA-së, ndërroi jetë këtë të mërkurë në moshën 84-vjeçare. Lajmi u dha nga familja e saj në një deklaratë. Sipas të njëjtave burime kohët e fundit ajo vuante nga një tumor.
"Ne kemi humbur një nënë, gjyshe, motër, teze dhe mike të dashur" - thuhet në deklaratë duke e vijëzuar Albright një "kampione të palodhur të demokracisë dhe të drejtave të njeriut".
Ishte Presidenti Bill Clinton që e emëroi Albright si ambasadore të SHBA-së në Kombet e Bashkuara menjëherë pasi ai mori detyrën në 1993.
Ndërsa 3 vjet më vonë e emëroi atë si Sekretare të Shtetit. Ajo u konfirmua edhe në 1997 me një votim unanim 99 me 0. Në atë kohë, ajo ishte gruaja me detyrën më e lartë në historinë e qeverisë amerikane.
Albright shërbeu në këtë post për 4 vjet, duke promovuar në mënyrë aktive zgjerimin e NATO-s dhe ndërhyrjen ushtarake në Kosovë.
Pasi la postin, ajo vazhdoi të jepte mësim në Shkollën e Shërbimit të Jashtëm të Universitetit Georgetoën dhe u shkroi 7 libra bestseller të New York Times.
Në vitin 2012, presidenti Barack Obama i dha Albright, Medaljen e Lirisë, nderimi më i lartë civil i vendit.
“Kurrë nuk e kam menduar se do të kisha atë lloj jete që kam pasur”, - tha ajo për revistën Elle në një intervistë në vitin 2020.
E pyetur për përvojën e saj më të mirë të punës, ajo tha: “Duke qenë Sekretare e Shtetit dhe duke u ulur pas tabelës ku thuhej: “Shtetet e Bashkuara”, veçanërisht pasi nuk kam lindur këtu dhe jam një amerikane shumë mirënjohëse”. Ajo ka lënë pas 3 vajza dhe 6 nipër e mbesa, si dhe një vëlla dhe një motër.
Kush ishte Madeleine Albright
E lindur në Pragë në vitin 1937, Albright, atëherë Madleine Korbel, u shpërngul në Angli me familjen e saj në vitin 1939, më pak se dy javë pasi Gjermania naziste pushtoi Çekosllovakinë. Ndërsa familja e saj ishte me prejardhje hebreje, ajo u rrit si katolike.
Familja e Albright jetonte në bodrumin e një apartamenti në Notting Hill përpara se të kthehej në Pragë pas Luftës së Dytë Botërore. Ata u shpërngulën në SHBA në vitin 1948 pas marrjes së Çekosllovakisë nga komunistët.
Familja e saj përfundimisht u vendos në Denver, ku babai i saj punoi si dekan i shkollës së marrëdhënieve ndërkombëtare në Universitetin e Denverit.
“Kam jetuar në shumë e shumë vende”, - rrëfente Albright.
Ajo u diplomua në Kolegjin Wellesley dhe mori një diplomë master në Universitetin e Columbia. U martua me Joseph Albright në vitin 1959. Çifti pati tre vajza dhe u divorcua në vitin 1982. Ajo nuk u martua përsëri.
Përpara se të bëhej sekretarja e 64’të e SHBA’së, Albright punoi për fushatën presidenciale të vitit 1972 të Edmund Muskie, një senator demokrat amerikan nga Maine, dhe më vonë u bë asistente e tij.
Ajo gjithashtu punoi si profesoreshë e marrëdhënieve ndërkombëtare në Universitetin Georgetoën nga viti 1982 deri në 1993.
“Ka një vend të veçantë në ferr për gratë që nuk ndihmojnë njëra-tjetrën”, - ishte fjalia e famshme e Albright. ©LAPSI.al
