Kryetari i Komanduar i Partisë Demokratike, Enkelejd Alibeaj i ka shtrirë dorën pjesës tjetër të partisë që përfaqësohet nga Komisioni i Rithemelimit.
Pas përfundimit të mbledhjes që zgjati afro 4 orë, Alibeaj tha se emrat e grupit të punës do të caktohen prej tij, por që tashmë po pret sinjale nga pala tjetër. I pyetur për kushtin e distancimit të ish-kryeministrit Sali Berisha, këtë herë Alibeaj nuk dha asnjë sqarim.
“Kjo është një shenjë tjetër e ngritjes së nivelit të përgjegjësisë. Me këtë sens përgjegjësie, duam bashkimin, një gjë e kërkuar nga demokratët, për të mirën e demokratët, duke hequr dorë nga gjuha e linçimit si mënyra e vetme për të bashkuar demokratët. Ky është çelësi i këtij morali, me ‘bon sens’, me mirëkuptim.
Është caktuar kryetari i komanduar, që do të thotë unë, që do caktoj emrat e negociatorëve, por po presim sinjalin e parë të kësaj rruge. Është gjithçka e qartë. Sot në vendimin e kryesisë, çdo dilemë e masë skepticizmi është e shkuar. Ju faleminderit dhe ndjesë për vonesën që patëm sot” – tha Alibeaj. ©LAPSI.al
