Greqia ka miratuar paketën e rezistencës sociale 1.1 miliard euro për 3.2 milionë qytetarë të saj. Me këtë paketë, shuma e masave sociale për vitin 2022 në Greqi arrin në 2 miliardë euro.
Kryeministri grek Kyriakos Mitsotakis tha se masat janë të përshtatura për të mbuluar nevojat urgjente të qytetarëve me ardhura familjare vjetore deri në 30.000 euro, pa dëmtuar buxhetin e vitit.
Këto masa do të jenë të vlefshme gjatë 3 mujorit të ardhshëm, prill, maj dhe qershor.
“Nuk do lejoj që për t’u dukur i mirë përkohësisht, të rrezikoj ecurinë e zhvillimit të ekonomisë së vendit”, tha Mitsotakis, duke u përgjigjur kritikave të forta opozitës për mbështetjen me “thërrime” në kohë të egra.
Përveç këtyre dy asistencave, në masat e vendosura nga qeveria parashikohet edhe ulja e taksave, bllokim i taksave të pasurive të palëvizshme dhe subvencionet për bujqësinë.
Konkretisht, individë dhe familje me të ardhura deri në 30.000 euro në vit, do të përfitojnë ulje të karburantit, ulje të çmimit të energjisë elektrike dhe lëndëve djegëse për ngrohje.
Asistencën e shtrenjtësisë 200-300 euro llogaritet ta marrin 1.4 milionë familje, masa që do të zbatohen nga muaji prill.
