FSHF publikoi përgjimin për Veliajn, tatimorët zbarkojnë te bizneset e Armando Dukës
Në përgjimin e publikuar ditën e sotme nga Federata Shqiptare e Futbollit kryebashkiakun e Tiranës implikohet në mënyrë direkte në betejën për drejtimin e FSHF-së. (Audio e plotë më poshtë) Në një konferencë për mediat, Drejtori i Departamentit të Komunikimit në FSHF, Andi Verçani zbuloi se ditën e djeshme Erion Veliaj ka zhvilluar një takim me disa anëtarë të komunitetit të futbollit dhe të Shoqatës Rajonale të Futbollit Tiranë ku mësuesve të edukimit fizik dhe trajnerëve të futbollit të rajonit të Tiranës i është bërë një listim i të gjithë gjërave që duhet të bëjnë. Çfarë bie në sy nga përgjimi audio është se përpos fjalëve banale që kryebashkiaku përdor, ai thekson se do të bëjë çdo gjë, përfshi nisjen e SPAK dhe Prokurorisë për, siç thotë vetë Veliaj, "ti nxirë jetën këtyre". "Unë do bëj çdo gjë që kam në dorë për t’ia nxirë jetën këtyre, me Prokurori dhe me SPAK. Tani edhe të duam të tërhiqemi ne, sepse nuk tërhiqen agjencitë që janë vënë në lëvizje." - thotë mes të tjerash Veliaj, që implikon veten edhe më rëndë, duke u shprehur si më poshtë: "Futbolli është i vetmi ishull që na ka mbetur pa vënë nën kontroll." - thekson kryebashkiaku. Por përgjimi nuk mbaron me kaq. Veliaj nuk përmbahet me fjalorin. "Po mir mër Sul (i drejtohet ish-futbollistit dhe ish-trajnerit të mirënjohur, Sulejman Mema, i cili është aktualisht kryetar i Shoqatës Rajonale të Futbollit Tiranë), që qesh me mu tani, po si ka mundësi që jua ka marrë dinjitetin, jua ka marrë burrërinë, si mund t’i presi robi k*qet dhe të sillesh si rrotë k***, duke qenë çun futbolli tërë jetën?" - thotë kreu i Bashkisë Tiranë. Përgjimi: [audio mp3="https://cdnimpuls.com/lapsi.al/wp-content/uploads/2022/01/WhatsApp-Audio-2022-01-24-at-141-2-AudioTrimmer.com_.mp3"][/audio] [audio mp3="https://cdnimpuls.com/lapsi.al/wp-content/uploads/2022/01/pjesa-2-.mp3"][/audio] Pasi këto biseda kërcënuese u bënë publike , Erion Veliaj nuk pati rrugë tjetër duke u detyruar për ta pranuar përgjimin audio dhe fjalorin e përdorur prej tij. "U qëndroj një për një atyre që kam thënë në atë palo përgjim të Federatës së Futbollit, e cila në vend se të garantojë barazinë e garës për kreun e saj, angazhohet në përgjime dhe shantazhe për llogari të beut të saj! Bashkia e Tiranës është aksionere e Klubit të Futbollit "Tirona", prandaj askush të mos ngatërrojë përkatësinë time në PS me përfshirjen time si aksioner në këtë proces zgjedhor të manipuluar nga beu i FSHF-së, apo të nxjerrë jashtë konteksti një bisedë djemsh, si në çdo fushë futbolli para ndeshjes! "Pavarësia" e FSHF-së nuk mund të jetë gjethe fiku për një mbret lakuriq që është kthyer në neverinë e aksionerëve e dashamirësve të futbollit shqiptar, i cili thjesht nuk e ka pëlqimin tonë si një prej aksionerëve." - reagoi Veliaj brenda një ore nga publikimi i audios. Por pavarësisht nga përpjekja e Veliajt për të mos e lidhur ndërhyrjen e tij flagrante me pushtetin socialist, por me rolin e tij si kryebashkiak, faktet e përgënjeshtrojnë atë. Sot Tatimet ia mësyan në Shkozet në zyrat e AIBA, bizjesi privat i Dukës, ndërkohë që prokuroria është vënë menjëherë në lëvizje kundër kreut të FSHF. Edhe mbështetësve të tjerë të Dukës si Shulkut dhe Lutfi Nurit i është bërë persion në bizneset e tyre nga organet shtetërore. Prandaj është jashtë çdo dyshimi se në betejën për futbollin ka zhytur duart pushteti i Edi Ramës, që edhe një herë tjetër banalin deri në neveri, ErionVeliajn po e përdor thjesht si mashë. ©LAPSI.AL
