Ulja e opozitës në tryezë me Damian Gjiknurin për të negociuar për reformën zgjedhore u komentua gjatë vitin e shkuar. Gjiknuri ishte kapur në përgjimet e prokurorisë për manipulimet në zgjedhjet e Dibrës, ndërsa bisedonte me Imer Lalën, një prej të fortëve të zonës që ishte përgjuar edhe duke folur për shitblerjen e votave.
Por përderisa opozita e PD-LSI pranoi të ulej në tryezë me Gjiknurin akuzat për manipulim të votave u zhvlerësuan, ndërsa rezultati në 25 Prill ishte i njëjti. PD foli përsëri për një "masakër elektorale" pas zgjedhjeve dhe ende sot akuzon për manipulime.
Ndërkohë që procesi i një reforme zgjedhore do të nisë sërish në një komision të ri parlamentar, propozimi i socialistëve nuk ka ndryshuar: Damian Gjiknuri është emri që vjen si bashkëkryetar i Komisionit me të drejtë vetoje.
Lëvizja ngjan me një deja vu. Opozita më parë ka thënë se nuk mund t'i imponojë mazhorancës të zgjedhë përfaqësuesit e saj në komisione, ndërkohë që mbetet për t'u parë nëse do të dërgojë sërish Oerd Bylykbashin për të negociuar mbi reformën zgjedhore apo dikë tjetër.
