Një ndërhyrje ushtarake e Shteteve të Bashkuara kundër Iranit mund të ndodhë brenda 24 orëve të ardhshme, paralajmëroi një zyrtar europian, të cilit i referohet agjencia Reuters, në një kohë kur tensionet në Lindjen e Mesme po përshkallëzohen ndjeshëm.
Ndërkohë, një zyrtar izraelit deklaroi se presidenti amerikan Donald Trump duket se e ka marrë tashmë vendimin për të ndërhyrë, edhe pse ende nuk është përcaktuar qartë shkalla dhe koha e saktë e operacionit ushtarak.
Sipas raportimeve, Shtetet e Bashkuara kanë nisur evakuimin e qindra ushtarëve nga baza ajrore Al Udeid në Katar, e cila është baza më e madhe ajrore amerikane në Lindjen e Mesme. Ky veprim shihet si parapërgatitje për një operacion të mundshëm ushtarak që mund të urdhërohet nga Donald Trump kundër Iranit.
Reuters raporton gjithashtu se po tërhiqet personel edhe nga baza të tjera ushtarake amerikane në rajon, pa specifikuar se për cilat vende apo objekte bëhet fjalë.
Situata mbetet e paqartë dhe shumë e tensionuar, ndërsa zhvillimet e orëve në vijim pritet të jenë vendimtare për stabilitetin e Lindjes së Mesme.
