Rreth 7000 biznese të vlerësuar me risk për deklarimin e pagave do të kontrollohen nga administrata tatimore. Njoftimin e kanë bërë vetë tatimet, të cilin e kanë shpërndarë edhe në rrjetet sociale, duke ftuar që të gjithë bizneset që të deklarojnë pagat reale të punonjësve të tyre.
Sipas administratës tatimore aksioni kundër informalitetit të pagave ka hyrë tashmë në fazën përfundimtare.
Në njoftimin e tatimeve thuhet:
"Kontrolli do të nisë për 7,000 tatimpagues të identifikuar me risk, të cilët nuk kanë reflektuar as pas njoftimit të dytë të Administratës Tatimore.
Ftojmë bizneset të deklarojnë pagat reale të punonjësve të tyre!
Nëse deklarimi i pagave reale bëhet tani, duke korrigjuar deklaratën në muajin nëntor, subjektet e identifikuara me risk do të përjashtohen nga kontrolli tatimor’"
Që në javën e tretë të muajit tetor ka qenë Kryeministri Edi Rama që ka njoftuar nisjen e një aksioni kombëtar kundër informalitetit për të nxitur deklarimin real të pagave të punonjësve. Në fillim të nëntorit vetë administrate tatimore njoftoi se nëntë mijë biznese rritën fondin e pagave me 1.25 miliard lekë, duke reaguar pozitivisht në deklaratatat e listëpagesave të tyre. Sipas të dhënave zyrtare në nisje të aksionit
Administrata Tatimore identifikoi rreth 37 mijë tatimpagues me risk në fushën e informalitetit të pagave. Tashmë 7000 prej tyre do të kalojnë në sitën e kontrollit tatimor.
