Mesazhet që qarkullojnë sikur Ervis Martinaj porositi Eigers Mihasin për t’i dërguar 100 mijë euro Gazment Bardhit, janë të rreme thotë SPAK. Fotot e këtyre mesazheve i ishin dërguar kreut të grupit parlamentar të PD-së, Gazment Bardhit në celularin e tij në formë shantazhi, ndaj pak ditë ma parë ky iu drejtua prokurorisë së posaçme. Nga verifikimet rezultoi se mesazhet ishin të pavërteta.
“Nga verifikimet e deritanishme të Prokurorisë së Posaçme, mesazhet e pretenduara se rrjedhin nga transkripte bisedash të kryera nëpërmjet SKY/ECC janë manipuluar duke sajuar biseda të pavërteta për individë dhe veprime të kundërligjshme” njoftoi SPAK, që ka nisur hetimet për të zbuluar origjinën e tyre.
Foto më lart është shpërndarë nga aplikacioni Signal i Gazment Bardhit, ku erdhën mesazhet në fjalë. Kur u paraqit në prokurori, Bardhi tha se këto ishin një tentativë për ta intimiduar në ushtrimin e detyrës si deputet i Kuvendit të Shqipërisë dhe si Kryetar i Grupit Parlamentar të Partisë Demokratike.
“Përmbajtja e mesazheve të dërguara, sajimi i rrethanave dhe fakteve të pandodhura, ndërlidhja e emrit tim me individë krejtësisht të panjohur prej meje, synon frikësimin tim për të mos përballur me fakte konkrete të paligjshmërisë subjekte të posaçme apo eksponentë të krimit të organizuar, që janë nën hetim apo verifikim nga Prokuroria e Posaçme Kundër Krimit të Organizuar dhe Korrupsionit”, u shpreh ai.
NJOFTIM PËR SHTYP I SPAK
(Shpërndarja e dezinformatave përmes aplikacionit Signal)
Në përgjigje të interesimit të shtuar të mediave informojmë publikun se Prokuroria e Posaçme kundër Korrupsionit dhe Krimit të Organizuar është vënë në dijeni për disa mesazhe që i kanë mbërritur politikanëve dhe figurave publike gjatë ditëve të fundit përmes aplikacionit të koduar të komunikimit, Signal.
Nga verifikimet e deritanishme të Prokurorisë së Posaçme, mesazhet e pretenduara se rrjedhin nga transkripte bisedash të kryera nëpërmjet SKY/ECC janë manipuluar duke sajuar biseda të pavërteta për individë dhe veprime të kundërligjshme.
Prokuroria e Posaçme, po monitoron nga afër këtë situatë dhe ka nisur verifikimet për të identifikuar burimet e këtyre mesazheve me qëllim ndjekjen penale të autorëve.
I bëjmë thirrje të gjithë qytetarëve dhe aktorëve publikë të tregojnë kujdes kur ndërveprojnë me mesazhe të kësaj natyre, si dhe të shmangin shpërndarjen e materialeve të paverifikuara.
