Në Partinë Demokratike vijon të jetë prezente përçarja e 2 grupeve sidomos ajo në mes deputetëve. Kreu i Grupit Parlamentar të Partisë Demokratike, Enkelejd Alibeaj vijon të thërrasë mbledhjet edhe pse një pjesë e tij, ajo që drejtohet nga Komisioni i Rithemelimit nuk e njeh.
Alibeaj madje vijon edhe agjendën e grupit për vendime të rëndësishme. Në një mesazh drejtuar deputetëve, Alibeaj u ka kërkuar atyre të mblidhen të martën në orën 15:30, në selinë blu, ku në fokus do të jetë procesi i reformës territoriale.
“Përshëndetje! Nesër në orë 15:30 në seli do të zhvillojmë mbledhje grupi. Mbledhja bëhet për të diskutuar mbi fillimin e procesit te reformes territoriale duke qenë se të mërkurën do të ketë mbledhjen e parë komisioni për reformën territoriale. Jeni të lutur të konsultoni dokumentin bashkëngjitur për çeshtjet që do diskutohen. Ju faleminderit!” – thuhet në SMS-në drejtuar deputetëve të PD-së.
Ndërsa krahu i Berishës thotë se vendimet e Alibeajt janë nul dhe nuk kanë asnjë efekt. ©LAPSI.al
