Që nga fillimi i luftës, BBC ka ndjekur dhe verifikuar të gjitha raportet për humbjet mes trupave ruse që luftojnë në Ukrainë. Këtu bëjnë pjesë njoftimet zyrtare, raportet e mediave lokale si dhe rrjetet sociale, por edhe duke folur me të afërmit e ushtarakëve rusë.
Deri në këtë moment BBC News Russian ka mundur të verifikojë vdekjen e 2 336 ushtarakëve rusë në luftë. BBC thotë se mund të japë emrat e tyre, gradat dhe njësitë ushtarake ku kanë shërbyer.
Kjo është gati dyfishi i shifrës së fundit zyrtare të publikuar nga Ministria e Mbrojtjes ruse në mars. Ka të ngjarë që shifra reale e humbjeve të ushtrisë ruse në Ukrainë të jetë shumë më e lartë nga sa ka mundur BBC të përcaktojë. Por analiza e këtyre të dhënave ndihmon për të parë tendencën e asaj që po ndodh me ushtrinë ruse.
Gati 20% e të gjitha viktimave të konfirmuara ushtarake janë oficerë. Ky raport ka mbetur i pandryshuar për 3 muajt e fundit. Ekspertët thonë se oficerëve rusë mund t’u duhet të rrezikojnë më shumë në vijën e frontit për shkak të problemeve të vazhdueshme me komunikimin.
Mbi 25% e të gjitha humbjeve janë parashutistë dhe marinsa. Këto njësi përdoren shpesh në operacionet e zbulimit. Megjithatë, ata shpesh nuk marrin mbështetje të mjaftueshme operacionale dhe mundësi evakuimi për të plagosurit.
Shumica e viktimave, të konfirmuara nga BBC, vinin nga rajonet më pak të zhvilluara dhe të privuara ekonomikisht të Rusisë. Ka vetëm 3 vdekje të konfirmuara të ushtarakëve nga Moska edhe pse kryeqyteti përbën pothuajse 9% të popullsisë ruse. Autoritetet ukrainase tani thonë se janë vrarë rreth 27 mijë ushtarë rusë. ©LAPSI.al
