Një atentat ka ndodhur mbrëmjen e së hënës në zonën e Thethit në Shkodër ku shënjestër e tij ishte një 23-vjeçar. Sipas policisë i riu Paulin Harusha është qëlluar me armë zjarri teksa ishte duke udhëtuar me mjetin e tij.
Ai është dërguar i plagosur në qendrën shëndetësore të Thethit, ndërsa policia ka mbërritur në vendin e ngjarjes. Një grup hetimor ka nisur punën për identifikimin e autorëve të dyshuar të kësaj ngjarje.
Burime nga policia e Shkodrës i thanë lapsi.al se i riu është qëlluar teksa udhëtonte vetëm me makinën e tij në drejtim të fshatit Ndërlysë. Persona të paidentifikuar kanë hapur zjarr me breshëri kallashnikovi, por fatmirësisht ai u ka shpëtuar plumbave duke marrë vetëm një gërvishtje të lehtë. ©LAPSI.al
