Një kontroll i zhvilluar në burgun e sigurisë së lartë në Peqin ka çuar në zbulimin e disa sendeve të ndaluara në posedim të të dënuarve.
Kontrolli u realizua nga Forcat Operacionale të Drejtorisë së Përgjithshme të Burgjeve, në bashkëpunim me forcat e sigurisë së IEVP-ve Peqin, Fier dhe Durrës, si edhe me Agjencinë e Mbikëqyrjes së Sistemit të Ekzekutimit të Vendimeve Penale.
Sipas njoftimit zyrtar, gjatë operacionit të dënuarve iu gjetën dhe sekuestruan telefona, një shishe raki 2-litërshe, dy shishe uiski, një shishe verë dhe karikues telefoni, sende që ndalohen brenda institucionit penitenciar.
Njoftimi:
Goditet rast i posedimit të sendeve të ndaluara në IEVP Peqin
Nga informacionet paraprake të siguruara nga strukturat e IEVP Peqin në bashkëpunim me Agjencinë e Mbikëqyrjes në Sistemin e Ekzekutimit të Vendimeve Penale, në kuadër të forcimit të masave të sigurisë, Forcat Operacionale të DPB-së dhe forcat e sigurisë së IEVP Peqin, IEVP Fier dhe IEVP Durrës ushtruan kontroll në ambientet e IEVP Peqin.
Gjatë kontrollit, të dënuarit të sigurisë së lartë G.B. iu gjetën: 1 shishe me raki (2 L), 2 shishe uiski (1.5 L), 1 shishe verë (1.5 L) dhe 2 karikues telefoni.
Të dënuarit P.V. iu gjetën: 1 celular i tipit iPhone, ngjyrë e zezë, 1 karikues, 2 fisha karikimi dhe 1 palë kufje wireless
Ndërsa të dënuarit L.D. iu gjetën: 2 telefona celularë (1 Google Pixel , ngjyrë e zezë dhe 1 Samsung, ngjyrë gri), 1 karikues ngjyrë e bardhë dhe 3 shishe raki (2 L).
Materialet procedurale i janë referuar Agjencisë për vijimin e veprimeve të mëtejshme procedurale, në përputhje me legjislacionin në fuqi.
