Fiorentina e Atalanta e mbyllin me barazim sezonin, duke u ndalur në shifrat 1-1 në “Franchi” në javën e 38-të dhe të fundit të Serie A. Të dyja skuadrat zbritën në fushë pa presion, duke qenë se “Dea” e kishte siguruar tashmë një vend në Conference League sezonin e ardhshëm, ndërsa Violat mbijetesën pas një sezoni vërtet të komplikuar.
Miqtë e nisën më mirë ndeshjen dhe angazhuan menjëherë Christensen me tre pritje ndaj Samardzic dhe Musah, por janë vendasit ata që kaluan papritur në avantazh 1-0 në minutën e 39’: Piccoli merr topin në thellësi, kalon Ahanor dhe mposht Sportiellon në shtyllën e parë, edhe falë një gabimi të portierit të Atalantës. Në zonën tjetër është sërish Christensen ai që përgjigjet ndaj iniciativës së Ahanor në fillimin e pjesës së dytë, ndërsa Sportiello devijon në goditje këndi goditjen e bukur të dënimit të Mandragorës, që po shkonte poshtë trekëndëshit në minutën e 60’.
Një çerek ore më vonë është përsëri një Christensen i pakalueshëm që ndal edhe Sulemana, me portierin danez që konfirmohet lojtari më i mirë në fushë me diferencë. Instinktive ishte më pas edhe pritja e Sportiellos ndaj Fabbian, ndërsa talenti i vitlindjes 2005, Dominic Vavassori, bëri debutimin e tij në Serie A me Atalantën në minutën e 82’.
Lexo më tej: Cesari për dorën e Pongracic në Fiorentina-Inter: "AIA do të thotë: gjithçka e saktë”
Kaluan vetëm pak çaste dhe Comuzzo shkaktoi një autogol fatkeq, duke vulosur rezultatin në 1-1: në tentativën për të paraprirë Scamacca pas krosimit të Zappacosta, mbrojtësi i Fiorentinës përfundon duke shtyrë topin në portën e tij. Vërshëllima finale zyrtarizon kështu barazimin 1-1, rezultat që i lejon Atalantës ta mbyllë sezonin në vendin e shtatë me 59 pikë: “playoff” i Conference League për “Dea”-n, që i jep lamtumirën teknikut Palladino. Fiorentina, ndërkohë, e përfundoi sezonin pa shumë shkëlqim me 42 pikë, me publikun që vendos t’i dedikojë kore vetëm teknikut Vanoli, edhe ai i destinuar të largohet nga pankina e tij.
