Një nga veprat e para abstrakte të artit nga Jackson Pollock është shitur në ankand në New York për 181 milionë dollarë, duke thyer rekordin e mëparshëm për një pikturë të artistit amerikan.
Konkretisht, vepra “Numri 7A, 1948” u shit të hënën nga shtëpia e ankandeve Christie’s dhe tejkaloi çdo shumë të regjistruar më parë për një vepër të artistit.
Duke ardhur nga koleksioni privat i manjatit të medias SI Newhouse, vepra tani renditet si e katërta më e shtrenjtë e shitur ndonjëherë në ankand, sipas ARTnews.
Sipas BBC-së, i njëjti ankand përfshinte edhe një skulpturë bronzi nga artisti rumun Constantin Brancusi, e cila u shit për 107.6 milionë dollarë, duke shënuar çmimin e dytë më të lartë për një skulpturë në ankand.
Pollock, i cili vdiq në vitin 1956, ishte një figurë qendrore në lëvizjen abstrakte ekspresioniste. Teknika e tij e pikturës me pika është një nga më të njohurat dhe shpesh të imituara në botën e artit.
Rekordi i mëparshëm në ankand për një vepër të tij ishte 61.2 milionë dollarë për “Numri 17, 1951”, e shitur në vitin 2021, ndërsa vepra të tjera janë shitur me çmime më të larta në marrëveshje private.
Christie’s e quajti “Numri 7A, 1948”, e cila përshkruan pika të zeza me vija të kuqe në një kanavacë më shumë se tre metra të gjerë, një vepër përcaktuese në historinë e artit. Përshkrimi i saj thotë:
“Me këtë vepër, Pollock çlirohet nga prangat e pikturës konvencionale me kavaletë dhe krijon një nga veprat e para vërtet abstrakte në historinë e artit.”
