Presidenti rus, Vladimir Putin ka mbërritur këtë të martë në Pekin, ku pritet të zhvilloj një takim me presidentin kinez Xi Jinping. Kjo vizitë e cila synon të forcojë lidhjen midis Moskës dhe Pekinit, vjen vetëm disa ditë pasi presidenti i SHBA-së, Donald Trump përfundoi një udhëtim historik në Kinë.
Kremlini tha se Putin dhe Xi priten të diskutojnë mënyrat për të thelluar partneritetin strategjik Rusi-Kinë dhe të shkëmbejnë pikëpamje mbi çështjet kryesore ndërkombëtare dhe rajonale. Në qendër të diskutimeve do të jenë lufta në Ukrainë dhe në Iran si dhe zhvillimet e fundit në arenën ndërkombëtare. Të dy udhëheqësit pritet gjithashtu të nënshkruajnë një deklaratë të përbashkët pas takimeve të tyre.
Mediat shkruajnë se udhëtimi i Putinit vjen menjëherë pasi Trump përfundoi vizitën e tij të parë në Kinë. Ai ishte një udhëtim i përqendruar në stabilizimin e marrëdhënieve të tensionuara midis Uashingtonit dhe Pekinit mes tensioneve të vazhdueshme gjeopolitike.
Marrëdhëniet midis Rusisë dhe Kinës janë forcuar ndjeshëm që kur Moska nisi pushtimin e Ukrainës në vitin 2022. Që atëherë, Rusia është bërë gjithnjë e më e varur ekonomikisht nga Kina, veçanërisht pasi Pekini mbetet një blerës i madh i naftës ruse të sanksionuar.
Një nga çështjet kryesore që pritet të përfshihet në bisedime është gazsjellësi i propozuar “Fuqia e Siberisë 2”, një projekt i madh energjetik që do të transportojë gazin natyror rus në Kinë përmes Mongolisë. Moska e ka shtyrë përpara projektin si një rrugë alternative strategjike për eksportet e energjisë.
