Tre studentë shqiptarë janë arrestuar në protestën e zhvilluar në Shkup, ku kërkohet që provimi i jurisprudencës të zhvillohet edhe në gjuhën shqipe. Ende nuk dihen arsyet e arrestimit të protestuesve.
Organizatori i protestës, Mevlan Ademi është shprehur se protesta nuk synon përplasje, por mbrojtjen e të drejtave gjuhësore dhe barazinë institucionale.
“Sot nuk kam ardhur të flas me ata. Sot kam ardhur të flas me ju. Sa kohë duhet të presim që, në qytetin e tij, një shqiptar të flasë shqip? Sa kohë duhet të presim që të jemi qytetarë të barabartë në këtë vend? Ne këtu jemi autoktonë”, tha Ademi.
Në protestë, studentët kanë kërkuar dorëheqjen e ministrit të Drejtësisë në Maqedoninë e Veriut. Tubimi u zhvilluar pranë Urës së Gurit në Shkup, ku morën pjesë mijëra studentë nga trevat shqiptare. Kjo është protesta e dytë që vjen si shprehje e revoltës së studentëve pas refuzimit të kërkesës së tyre nga ministri aktual i Drejtësisë, Igor Filkov.
Sipas Ligjit për Provimin e Jurisprudencës në Maqedoninë e Veriut, nuk ekziston ndonjë kufizim që detyron dhënien e provimit vetëm në gjuhën maqedonase. Ligji për Përdorimin e Gjuhëve, i miratuar në vitin 2019, detyron institucionet shtetërore të lejojnë përdorimin e gjuhës shqipe nëse të paktën 20% e qytetarëve flasin këtë gjuhë.
Neni 2 dhe Neni 5 i këtij ligji përcaktojnë qartë që institucionet shtetërore dhe gjykatat duhet të mundësojnë përdorimin e gjuhës shqipe në të gjitha procedurat zyrtare.
