José Mourinho po përgatitet të bëhet trajneri i ri i Real Madrid. Një rikthim për të pas periudhës 2010-2013, menjëherë pas Tripletës me Interin. Tashmë mungon vetëm zyrtarizimi për të parë sërish “Special One” në stolin e “Los Blancos”. Një zgjedhje e diktuar nga dëshira për të marrë një figurë me eksperiencë, e kërkuar fort nga Florentino Perez dhe që njeh ambientin. Presidenti i Realit shpreson të përsërisë operacionin Ancelotti, periudha e dytë e të cilit në Madrid ishte shumë e suksesshme me fitimin e disa trofeve.
Por situata që Mourinho do të duhet të menaxhojë nuk do të jetë aspak e lehtë. Ose më saktë, dhoma e zhveshjes që do të gjejë nuk është ndër më të qetat. Ngjarja e sherrit të ashpër mes Valverde dhe Tchouaméni, si edhe çështjet që shoqëruan dëmtimin dhe rikuperimin e Mbappé, kanë krijuar një përçarje të thellë. Lojtarët janë aq të ndarë sa edhe gjatë stërvitjeve krijohen dy grupe të veçanta.
Arbeloa, aktualisht në krye të skuadrës, përpiqet të shmangë ushtrimet që mund të shkaktojnë duele dhe përplasje mes lojtarëve që nuk kanë marrëdhënie të mira. Marca ka publikuar pamje nga stërvitja e Real Madrid para transfertës ndaj Sevillas, ku vihet në pah pikërisht kjo ndarje e thellë. Në çdo ushtrim, lojtarët e huaj, të udhëhequr nga francezët, stërviteshin të ndarë nga lojtarët spanjollë, mes të cilëve edhe Valverde.
Dy grupet e krijuara te Real Madrid: të ndarë qartë në stërvitje
Pamja e gjerë e fushës tregon grupin në të djathtë ku ndodhen pothuajse të gjithë yjet, lojtarët e huaj, të udhëhequr nga Courtois, Mbappé, Vinicius, Camavinga, Tchouameni, Rudiger, Alexander-Arnold, Alaba dhe Bellingham, ndërsa grupi në të majtë përbëhet nga lojtarët spanjollë të skuadrës, të rinjtë e ardhur nga akademia dhe ata që po gjejnë hapësira në ekipin e parë, si Carreras, Valverde, Asencio, Ceballos, Carvajal dhe Brahim Diaz.
Një situatë surreale po të mendosh se bëhet fjalë për Real Madrid, skuadrën më të rëndësishme të Spanjës bashkë me Barcelonën dhe Atletico Madridin, që po shkon drejt mbylljes së një sezoni absurd në çdo aspekt. Mourinho do të ketë detyrën shumë të vështirë të ribashkojë dhomën e zhveshjes duke u mbështetur te lojtarët me më shumë eksperiencë, karizëm dhe personalitet. Përçarja nuk ka lindur sot: vjen prej muajsh, që nga koha e Xabi Alonsos, dhe u përkeqësua me çështjen Valverde-Tchouaméni në fillim të majit.
Lexo më tej: “Hala Madrid”, postimi i Mbappé ngjan si tallje: tifozët e Realit i vërsulen keq
Videoja e publikuar sot është vetëm prova e parë e qartë vizive se si grupi është ndarë fizikisht. Sigurisht që nuk kanë ndihmuar as deklaratat nga distanca mes Mbappé dhe Arbeloa gjatë ndeshjes së fundit të Realit ndaj Getafes, kur francezi deklaroi për televizionet kombëtare se trajneri i kishte thënë të konsiderohej si sulmuesi i katërt i skuadrës.
