Një incident i rëndë është regjistruar në Modena të Italisë, ku një automjet me shpejtësi të lartë ka hyrë në një zonë të kufizuar për qarkullim dhe ka përplasur një grup këmbësorësh.
Autoritetet italiane kanë arrestuar 31-vjeçarin Salim el Koudri, shtetas italian me origjinë marokene, i lindur në Bergamo dhe banues në provincën e Modenës. Ai nuk kishte precedentë penalë, ndërsa mediat lokale raportojnë se dyshohet të ketë vepruar i shtyrë nga pakënaqësi personale, duke u ndjerë i ngacmuar.
Nga ngjarja kanë mbetur të plagosur rreth shtatë persona, dy prej tyre në gjendje të rëndë, ndërsa një grua raportohet se mund t’i nënshtrohet amputimit të të dyja këmbëve. Makina është përplasur gjithashtu me një vitrinë dyqani dhe një biçikletë, përpara se të ndalej në trotuar. Pas përplasjes, drejtuesi është larguar në këmbë dhe sipas dëshmitarëve, ka tentuar të sulmojë një kalimtar me thikë, por është ndaluar nga qytetarët deri në mbërritjen e policisë.
Në vendngjarje ndërhynë karabinierët, policia lokale dhe shërbimet e emergjencës, përfshirë helikopterë nga Bolonja dhe Pavullo. Kryebashkiaku i Modenës vlerësoi reagimin e qytetarëve që ndihmuan në neutralizimin e autorit, duke shmangur një tragjedi më të rëndë. Autoritetet kanë përjashtuar pistën e terrorizmit dhe po e hetojnë ngjarjen si akt kriminal individual, ndërsa dëshmitarët thonë se makina lëvizte me rreth 160 km/orë dhe përplasjet ishin të forta.
