Një ngjarje e mundshme kriminale është parandaluar nga policia në zonën e ish-Kënetës në Durrës. Një 44-vjeçar, në gjendje të dehur, ka përplasur automjetin e policisë në përpjekje për t’i ikur policisë që po e ndiqte. Patrulla ishte njoftuar për një shtetas që lëvizte me shpejtësi dhe në mënyrë të pakontrolluar në rrugët e lagjes 17, zonës së ish-Kënetës, vend në të cilin pak javë më parë u përplasën për vdekje 2 të mitur, dhe është vënë në ndjekje të tij. Patrulla e qarkullimit i dha sinjal automjetit pa targa për të ndaluar, por drejtuesi i makinës nuk i është përgjigjur thirrjes dhe ka vijuar të qarkullojë. Në ndihmë të patrullës së Policisë kanë shkuar dhe 2 inspektorë me motorë. Pas një ndjekjeje për disa minuta, oficerët e qarkullimit rrugor kanë arritur ta bllokojnë makinën pa targa.
44-vjeçari Rezart Abazaj, u arrestua në flagrancë dhe prokuroria po kryen veprimet procedurale ndaj tij. Ndërkohë pas testit të alkoolit rezultoi me 1.4 mg/l. Abazaj rezulton të jetë përsëritës për veprën penale të drejtimit të mjetit në gjendje të dehur. Ai qe arrestuar dhe më 5 mars të këtij viti nga policia pas një incidenti me automjet, në gjendje të dehur, në rrugën Vellazërimi, por gjykata caktoi masën e sigurisë detyrim paraqitjeje ndaj tij, duke e kthyer sërish në rrugë dhe rrezikuar jetën e përdoruesve të rrugës, përfshirë dhe të punonjësve të policisë.
