Britney Spears është përfshirë sërish në një incident që ka tërhequr vëmendjen e mediave rozë, pasi raportohet se ka shkaktuar skena “kaotike” gjatë një darke në një restorant në Los Angeles.
Sipas TMZ, këngëtarja 44-vjeçare ndodhej në restorantin Blue Dog Tavern në Sherman Oaks së bashku me dy miq, kur thuhet se nisi të bërtiste, të ngrinte zërin dhe madje të imitonte lehje qeni, duke shqetësuar klientët e tjerë.
Një dëshmitar pretendoi se Spears u pa duke kaluar pranë tavolinave me një thikë në dorë, gjë që krijoi frikë tek disa klientë se ajo mund të lëndonte dikë aksidentalisht. Megjithatë, përfaqësuesit e artistes mohuan kategorikisht raportimet, duke deklaruar se Britney po përdorte thikën vetëm për të prerë hamburgerin e saj.
Po ashtu, stafi i restorantit thuhet se i kërkoi shokut të Spears që ta bindte këngëtaren të fikte cigaren që kishte ndezur pranë hyrjes së lokalit.
Burime për TMZ thanë se në fund të darkës tavolina e saj dukej “si të kishte qenë një fëmijë i vogël aty”, ndërsa më pas Britney u largua nga ambienti e shoqëruar nga ekipi i saj i sigurisë.
Përfaqësuesi i këngëtares reagoi më vonë për mediat, duke i quajtur raportimet “të ekzagjeruara”.
"Britney po shijonte një darkë të qetë me asistenten dhe truprojën e saj. Ajo thjesht po tregonte një histori për qenin e saj që lehte ndaj fqinjëve,” deklaroi ai.
