Seanca plenare në Kuvend është shoqëruar me debate mes mazhorancës dhe opozitës lidhur me raportin për procesin e integrimit europian dhe mungesën e Kryeministrit në sallë. Kreu i grupit parlamentar të Partisë Demokratike, Gazment Bardhi, kërkoi praninë e Kryeministrit Edi Rama në seancë, duke argumentuar se raporti është dokument i Këshillit të Ministrave dhe duhet të prezantohet nga kreu i qeverisë.
“Ky është një raport i Këshillit të Ministrave, që sipas Kushtetutës e përfaqëson kryeministri. Do duhej të ishte kryeministri në seancë që të informonte Kuvendin mbi procesin e integrimit europian. Aq më shumë që kemi edhe një ministër shteti përgjegjës për negociatat që s’është prezent. Llogaridhënia nuk bëhet me korrespondencë”.
Nga ana tjetër, kreu i grupit parlamentar të Partisë Socialiste, Taulant Balla, u shpreh se debati duhet të vijojë sipas procedurës parlamentare dhe pa penguar procesin e miratimit të rezolutës.
“Ky mocion me debat sot është i lidhur me nenin 103, ku thuhet se në përfundim të debatit miratohet rezoluta, e cila ka kaluar me konsensus. Do ishte në të mire të procesit, që të lexojmë rezolutën dhe më pas të çelim debatin. Të mos ta prishim punën e mirë të komisionit dhe të shkojmë përpara me diskutimet”, tha Balla.
