Policia e Tenesit ka publikuar një video ku shihet momenti kur një oficer futet me nxitim në një shtëpi që po digjej dhe shpëton një nënë dhe dy fëmijët e saj. Incidenti ndodhi më 1 maj.
Sipas mediave amerikane, oficeri Rogers ishte i pari që mbërriti në vendin e zjarrit dhe pasi u njoftua nga fqinjët se njerëzit ishin bllokuar në shtëpi, pa u menduar dy herë, ai hapi derën dhe vrapoi për të shpëtuar familjen me 3 anëtarë.
Rogers i përballoi flakët dhe tymin e dendur për të nxjerrë shëndoshë e mirë nga shtëpia Marlowe 4-vjeçare, Charles 10-vjeçar dhe nënën e tyre, Rachel Blaylock.
Pamjet e kamerave të trupit tregojnë Rogers duke ecur përmes tymit dhe flakëve, duke nxjerrë Marlowen e vogël jashtë dhe duke ia dhënë një burri.
"Vazhdoja të mendoja, si do t'i zbrisja dy fëmijët nga shkallët? Ai thjesht e kapi dhe mezi priste të kthehej brenda. Dhe unë po përpiqesha t'i thoja se nuk kishte askush tjetër atje, por ai po ngjitej përsëri", - tha Blaylock.
"U përpoqa ta falënderoja atë natë, por ai thjesht e shpërfilli, sikur të ishte thjesht një ditë normale në punë", tha ajo.
Fqinja Ebony Cox thotë se po bëhej gati për të fjetur kur dëgjoi britma nga apartamenti ngjitur. Kur doli jashtë, pa shtëpinë në flakë.
"Po mendoja, ju lutem, ju lutem, dikush t'i nxirrte jashtë," thotë Cox. Ajo e pa oficerin teksa hyri brenda. "Ai ishte thjesht një burrë i guximshëm që reagoi në atë mënyrë. Mund të ishte lënduar, por nuk i interesonte. Ai thjesht vazhdonte të godiste derën me shqelma."
Siç tha Departamenti i Policisë së Chattanoogas në një postim në Facebook: “Policia nuk është e trajnuar për të shuar zjarret, por oficerët janë të betuar të shërbejnë dhe të mbrojnë. Dhe kjo është pikërisht ajo që bëri oficeri Rogers kur shkoi në vendin e ngjarjes.
Pasi fqinjët njoftuan oficerin Rogers se kishte ende njerëz brenda, ai menjëherë ndërmori veprime dhe shpëtoi dy fëmijë dhe nënën e tyre. Për fat të mirë, nuk u raportuan lëndime” – thuhet në njoftim. ©LAPSI.al
