Mafia shqiptare dyshohet se ka zgjeruar ndjeshëm praninë e saj në Ticino të Zvicrës, përmes një rrjeti të rinjsh të angazhuar në shpërndarjen e drogës, të njohur si “cavallini” apo “kuajt e drogës”, raporton media zvicerane.
Sipas raportimeve, bëhet fjalë për të rinj që vijnë nga Shqipëria dhe lëvizin më pas drejt Zvicrës përmes Italisë, shpesh me makina me qira. Ata qëndrojnë për disa muaj dhe furnizohen me drogë nga organizata kriminale, në këmbim të një pagese mujore që varion nga 500 deri në 1,000 franga, ndërsa të ardhurat nga shitjet shkojnë për rrjetin.
Një rast i fundit i raportuar është arrestimi në Capolago i një 24-vjeçari shqiptar, të kapur me 54 gramë kokainë. Autoritetet thonë se numri i të arrestuarve për trafik droge në Ticino ka shënuar rritje të ndjeshme gjatë vitit 2025.
Sipas policisë kantonale, këta shpërndarës veprojnë në mënyrë të organizuar dhe të lëvizshme, duke shmangur ekspozimin e drejtpërdrejtë në terren dhe duke u zëvendësuar shpejt në rast arrestimi. Kokaina e qarkulluar, sipas hetuesve, ka pastërti të lartë dhe shitet me çmime konkurruese, çka ka ndikuar edhe në rritjen e konsumit. Autoritetet dhe ekspertët lokalë paralajmërojnë se fenomeni po përhapet edhe në zona që më parë konsideroheshin të paprekura, ndërsa varësia nga droga mbetet një shqetësim në rritje për komunitetin.
