Shqipëria ka "mbetur sërish në klasë" në raportin e vlerësimit të Piketave të Ndërmjetme të njiohur si IBAR, mekanizmi teknik që lidh fazën e hapjes së kapitujve me atë të mbylljes së tyre.
Lapsi.al mësoi se mesditën e së martës u mblodh sërish në Bruksel Grupi i Punës për Zgjerimin dhe Vendet që negociojnë anëtarësimin (COELA) për të zhvilluar një “shkëmbim pikëpamjesh” mbi draft-pozicionin e përbashkët të përkohshëm për Shqipërinë.
Mësohet se për Shqipërinë, raporti IBAR vijon të mbetet pezull dhe se nuk ka gjasa që të ndodhë përparaverës. Burimet sqaruan se shkak ishte mungesa e konsensusit politik midis 9 shteteve anëtare të BE-së, pavarësisht një vlerësimi teknik pozitiv nga Komisioni Evropian.
Disa nga shtetet anëtare, përfshirë Gjermaninë, Holandën, Greqinë dhe Poloninë, kanë ngritur "flamuj të kuq" dhe kanë kërkuar informacione shtesë mbi disa çështje të ndjeshme ku kryesorja mbetet pavarësia e gjyqësorit. Lapsi.al mëson se sërish raporti nuk u ka kaluar ambasadorëve të vendeve anëtare për miratim.
Çështja "Balluku" duket se vijon të mbetet "elefanti në dhomë" në diskutimet për integrimin e Shqipërisë në BE. Serbia u ndëshkua për ndryshime ligjore që nuk kanë sjellë asnjë pasojë, madje thjesht kanë të bëjnë me lëvizje prokurorësh lokalë kurse në Shqipëri, refuzimi për heqjen e imunitetit të zv.Kryeministres konsiderohet si cenim politikisht i thelbit të reformes dhe rolit të SPAK.
Pas "shkëmbimit të mendimeve" këtë martë, Presidenca e Këshillit Europian do të duhet të hartojë një "tekst kompromisi" që plotëson kërkesat specifike të shteteve skeptike përpara se IBAR të mund të miratohet në mënyrë përfundimtare dhe unanime. Miratimi i IBAR do t’i lejonte Shqipërisë të fillonte mbylljen e kapitujve të negociatave dhe që mund të ndodhë vetëm në fund të 2026-ës. /LAPSI.al
