Detaje të reja kanë dalë në dritë nga operacioni antidrogë në kryeqytetin italian, gjatë të cilit u kapën 2 shqiptarë duke trafikuar kokainë, kurse në banesë iu gjetën 40 mijë euro cash dhe bllok shënimesh të ‘biznesit’.
Lëvizjet e dyshimta në një makinë me qira u pasuan nga zbulimi i një rrjeti të plotë të magazinimit dhe shitjes së drogës midis Via Ipogeo degli Ottavi dhe Casal del Marmo, në Romë të Italisë.
Dy shqiptarë, njëri prej të cilëve tashmë i njohur për forcat e rendit, u arrestuan nga oficerët e karabinierisë nga stacioni i Ottavias me akuzën e posedimit të lëndës narkotike me qëllim shitjen. Droga fshihej te ndarja e derës së makinës, në një hapësirë të krijuar posaçërisht për të mbajtur kokainën.
Një tjetër detaj interesant ka qenë gjetja e librave të shënimeve të mallit të blerë, xhiros dhe blerësve potencialë të drogës. Këto blloqe do shërbejnë për të thelluar më tej hetimet e drejtësisë italiane, për të zbërthyer celulën e shpërndarësve të drogës në Romë.
E gjitha filloi dje pasdite, kur oficerët ndaluan një makinë me qira për një kontroll rutinë në rrugë. Nervozizmi i shoferit i shtyu oficerët të kryenin një kontroll më të plotë të automjetit. Kontrolli dha një rezultat pozitiv: tre pako që përmbanin 11 doza kokaine ishin fshehur në pragun e derës së makinës. Ata gjetën gjithashtu 400 euro në para të gatshme me vete.
Hetimi u zhvendos menjëherë në një apartament aty pranë në zonën Casal del Marmo, ku u gjet një burrë i dytë 21-vjeçar. Brenda shtëpisë, hetuesit zbuluan atë që ata besojnë të jetë një qendër logjistike për trafikun lokal të drogës. Ata gjetën 270 gramë kokainë, disa të ndara tashmë në doza, disa të paketuara në vakum, 40'120 euro në para të gatshme dhe tre libra kontabël që regjistronin transaksionet e drogës.
Kontrollet u zgjeruan edhe në automjete të tjera të parkuara në zonë dhe të lidhura me të dyja, duke çuar në zbulimin e lëndëve të tjera narkotike. Në fund të operacionit, u sekuestruan droga, paratë dhe dy automjete. Gjyqësori, pasi e vlerësoi arrestimin, urdhëroi që të dy burrat të mbaheshin në paraburgim në burgun Regina Coeli.
