Një ambient i fshehtë për kultivimin dhe përpunimin e drogës është zbuluar në fshatin Vreshtas të Maliqit, i ndërtuar poshtë një koteci shpendësh. Sipas Prokurorisë së Korçës, hapësira nëntokësore ishte përshtatur në mënyrë profesionale për kultivimin dhe tharjen e cannabis sativa, me sisteme ventilimi, ndriçimi, ngrohjeje dhe ujitjeje. Për rastin është arrestuar shtetasi me iniciale K.L., ndërsa një person tjetër është shpallur në kërkim.
Gjatë operacionit, të zhvilluar në bashkëpunim me Policinë e Korçës, u sekuestruan rreth 5.4 kilogramë cannabis sativa në proces tharjeje dhe e paketuar në doza të vogla, një sasi e vogël e dyshuar kokainë, peshore elektronike, pajisje të kultivimit, si dhe një armë në formë pistolete me bombol gazi të kompresuar. Hetimet kanë zbuluar gjithashtu se ambienti furnizohej me energji elektrike në mënyrë të paligjshme, përmes lidhjes direkte me rrjetin.
