Pas kallëzimit të një 21-vjeçareje se është ngacmuar seksualisht nga kirurgu 72-vjeçar shtetasi N.N, pasi ishte paraqitur pranë Spitalit Rajonal Korçë për simptoma shëndetësore, lidhur me këtë situatë ka reaguar spitali, duke bërë të ditur se është vënë menjëherë në dijeni të rastit dhe ka bashkëpunuar me organet ligjzbatuese për ndjekjen e të gjitha procedurave të nevojshme.
Duke e konsideruar këtë një çështje tejet sensitive dhe serioze, Spitali Rajonal Korçë shpreh qëndrimin e prerë se çdo pretendim apo sjellje që cënon dinjitetin, integritetin dhe sigurinë e pacientëve është e papranueshme dhe duhet të trajtohet me përgjegjësi të plotë institucionale dhe ligjore.
Mësohet se institucioni ka nisur menjëherë verifikimet administrative të brendshme, ndërkohë që do të ndiqet me korrektësi çdo procedurë në përputhje me legjislacionin në fuqi dhe rezultatet e hetimeve të organeve kompetente.
Për këtë shkak, deri në një vendim nga organet kompetente, është bërë pezullimi i mjekut nga funksionet e tij.
Në respekt të procesit hetimor dhe për të garantuar integritetin e tij, Spitali Rajonal Korçë nuk mund të japë në këtë fazë detaje të mëtejshme mbi rastin.
Mbrojtja e pacientit, etika profesionale dhe standardet e ofrimit të kujdesit shëndetësor mbeten prioritete të panegociueshme për institucionet tona.
