Nëse Juventus do të luajë në Champions League sezonin e ardhshëm (hipotezë shumë më e realizueshme pas fitores së rëndësishme në Lecce), një pjesë e madhe e meritës do t’i takojë Dusan Vlahovic. E thënë një muaj më parë, kjo fjali do të ishte konsideruar absurde. Serbi ishte zhdukur nga radarët, i bllokuar nga një dëmtim që dukej se nuk mbaronte kurrë, larg Juves si fizikisht ashtu edhe filozofikisht për shkak të një negociate rinovimi kontrate të ngecur prej kohësh. Por tani gjithçka ka ndryshuar.
Në gjashtë ditë, mes ndeshjes në shtëpi kundër Veronës dhe transfertës në Lecce, Vlahovic ka luajtur 121 minuta, më pak se një ndeshje e gjysmë. Ka shënuar dy gola që i kanë dhënë skuadrës së tij 4 pikë, një tjetër gol iu anulua për një asgjë dhe krijoi të paktën gjashtë raste të pastra. Serbi është rikthyer me urinë e fillimit të karrierës, me dëshirën për të pushtuar botën. Dhe ka vendosur fatin e dy ndeshjeve, pas muajsh të tërë boshllëku absolut.
Goli rekord
Dusan Vlahovic rikthehet titullar me gol dhe shkruan emrin e tij në librin e rekordeve të historisë së Juventusit. Goli i shënuar në Lecce nga serbi, pas vetëm 12 sekondash, është goli më i shpejtë në historinë e klubit bardhezi. U thye rekordi i mëparshëm që datonte në Juventus-Inter 1-3 të nëntorit 2012 me golin e Arturo Vidal pas 18 sekondash. Në 14 vitet mes një goli dhe tjetrit, në Serie A kanë shënuar më shpejt vetëm Leao dhe Lozano, respektivisht pas 6 dhe 9 sekondash.
E ardhmja e Vlahovic
Juventusi është kështu shumë më pranë Champions League, objektivi minimal i sezonit. Por a do ta luajë Vlahovic Champions-in e ardhshëm? Me shumë mundësi po dhe po aq me shumë mundësi jo me fanellën bardhezi. Së fundmi drejtuesit e klubit kanë bërë të ditur se do të rikthehen të flasin për rinovimin e mundshëm të kontratës (që skadon siç dihet më 30 qershor) vetëm në fund të kampionatit dhe pasi të sigurohet objektivi Champions. Por nuk është e sigurt nëse ekzistojnë ende hapësira për negociata. Gjatë dëmtimit dukej se nga ana e lojtarit dhe përfaqësuesve të tij kishte disa sinjale afrimi, por më pas gjithçka u zhduk. Pozicionet janë shumë larg për momentin. Mbetet për t’u kuptuar nëse ekziston ende mundësia për t’u ulur sërish dhe për të provuar.
Vlahovic me shumë gjasa do të marrë një rrugë tjetër. Teorikisht kushton zero, por si gjithmonë në këto negociata duhet paguar një shumë e konsiderueshme komisionesh për agjentët dhe babain e lojtarit. Është mjaft e lehtë të parashikohet se vetëm një skuadër mes dhjetë më të mirave të Europës mund të përballojë një investim kaq të rëndë. Prej disa ditësh flitet me këmbëngulje për Barcelonën, që duhet të zëvendësojë Lewandowskin. Është një hipotezë, por nga tani deri më 30 qershor dhe ndoshta edhe më tej, do të dalin shumë të tjera. Pothuajse me siguri jo italiane.
