Asnjë surprizë, çdo gjë ashtu si pritej në fund të sezonit të rregullt në Abissnet Superiore. E me asnjë surprizë nuk nënkuptohet fakti që skuadrat në vështirësi morën pikët në fusha që normalisht do të ishin problematike, por sepse të gjithë ata që kishin nevojë për pikë i morën pa asnjë problem. Tirana fitoi në Elbasan, Teuta mundi Egnatian e Vora të gjorin Bylis, që e dinte fatin që e priste. 36 javë u mbyllën tashmë me verdiktet e fundit, ndërsa faza e katërt i ka lënë shije të hidhur tifozëve… vetëm atyre.
Fituan të gjithë ata që i duhej
Faza e katërt e magjishme e Tiranës u mbyll si nisi: 23 pikë në 9 ndeshje, shtatë fitore e dy barazime pa asnjë humbje, duke bërë më shumë pikë se në tre fazat e para bashkë, ku në 27 ndeshje bardheblutë morën 21 pikë. Këtë herë skuadra e Orges Shehit shkoi të fitonte në Elbasan 1-3, aty ku kryesuesit shpenzuan një pikë avantazh për në Final 4 ndaj Vllaznisë (do të kenë 0 diferencë në katërshe), duke lejuar kryeqytetasit të shpëtonin nga playout me fitoren 1-2.
[video width="646" height="360" mp4="https://cdnimpuls.com/lapsi.al/wp-content/uploads/2026/05/6a00a12fd1386.mp4"][/video]
Sukses logjik për Vllazninë, 2-0 kundër Flamurtarit të rënë që një javë më parë nga kategoria. Shkodranët kthehen të parët me një pikë mbi Elbasanin, por në Final 4 do të jetë një histori më vete.
[video width="756" height="360" mp4="https://cdnimpuls.com/lapsi.al/wp-content/uploads/2026/05/6a00a43ac40af.mp4"][/video]
Vora shpëton, duke parakaluar Teutën, me fitoren e pritshme ndaj Bylis, që pranon me sportivitet rënien nga kategoria. Fitoret u ndanë në mënyrë të drejtë mes dy skuadrave, secila nga dy në shtëpinë e tyre dhe 5-2 i javës së fundit i dha mundësinë skuadrës së Bellait të shpëtojë direkt, duke i lënë vendin në playout Teutës.
[video width="642" height="360" mp4="https://cdnimpuls.com/lapsi.al/wp-content/uploads/2026/05/6a00a1ad5924b.mp4"][/video]
Durrësakët morën fitoren e parë pas 8 javësh, duke mundur në Niko Dovana Egnatian 3-2, që misionin e kishte përmbushur një javë më parë duke përjashtuar Partizanin nga Final 4. Pikë që i duheshin skuadrës së ardhshme të teknikut Tetova, por që duhet të luajë edhe një ndeshje në playout me një mes Besës e Pogradecit për të siguruar qendrimin në Superiore.
[video width="746" height="360" mp4="https://cdnimpuls.com/lapsi.al/wp-content/uploads/2026/05/6a00a9249afb0.mp4"][/video]
“Ngushëllimi” në derbi
Fitorja e vetme që nuk i bënte dhe prishte punë askujt ishte e Partizanit në derbin e kryeqytetit me Dinamon. Blutë e kishin distancën e sigurisë dhe lejuan pa keqardhje një fitore ngushëlluese të të kuqve 2-1 e para në fazën e katërt për njerëzit e drejtuar nga Zhivanaj. Tekniku Daja kishte për të menduar për finalen e Kupës dhe Final 4, ndaj kjo ndeshje nuk kishte prakitikisht asnjë rëndësi për Dinamon e tij.
[video width="642" height="360" mp4="https://cdnimpuls.com/lapsi.al/wp-content/uploads/2026/05/6a00980777a78.mp4"][/video]
Verdiktet
Vllaznia, Elbasani, Egnatia e Dinamo do të luajnë në Final 4 nga 16 maji deri në 31 maj. Shkodranët e verdheblutë do të nisin me pikë të barabarta, Egnatia do ti ndjekë 3 pikë pas dhe Dinamo 7 pikë distancë.
Në playout shkon Teuta, që pozicionohet në vendin e tetë dhe për qendrimin në Superiore do të ndeshet me një mes Besës e Pogradecit, ndërsa Bylis i bashkohet Flamurtarit në Kategorinë e Parë sezonin e ardhshëm.
