Paris Saint-Germain është një kolektiv i mrekullueshëm, një makineri perfekte, që të jep idenë se argëtohet teksa luan dhe fiton. Klubi francez u kualifikua për herë të dytë radhazi në finalen e Champions League, të cilën do ta luajë si favorit ndaj Arsenal të shtunën më 30 maj. Dembélé, fituesi aktual i Topit të Artë, ishte vendimtar edhe duke shënuar në gjysmëfinalen e kthimit ndaj Bayern Munich, ku edhe një herë “pikturoi futboll” Kvicha Kvaratskhelia, lojtari më dominues dhe më vendimtar i kësaj Champions League.
“Nëse nuk vrapoj dhe nuk mbroj, përfundoj në stol”
Dy gola në gjysmëfinalen e parë, një asist fantastik në kthim. Të thuash se Kvaratskhelia kontribuoi është pak. Ajo që është e sigurt është se ish-lojtari i Napolit ka bërë një hap tjetër përpara me Luis Enrique, i cili e ka vendosur në qendër të projektit. I ka dhënë shumë liri, por ai është si gjithë të tjerët dhe duhet të lodhet, të vrapojë dhe të kthehet pas, siç e tha hapur pas kalimit të gjysmëfinales: “Jemi një grup i bashkuar, punojmë shumë dhe kemi një shpirt të madh skuadre. Sakrifikohemi për njëri-tjetrin. Bëjmë mirë atë që na kërkon trajneri. Unë luaj për të fituar dhe e di që duhet të vrapoj dhe të mbroj, përndryshe përfundoj në stol”.
Rekordi: askush si Kvara në Champions
Kvaratskhelia është bërë i pandalshëm dhe në Champions League po tregon talentin e tij të jashtëzakonshëm. Sepse kampionët e mëdhenj bëjnë diferencën kur ka rëndësi dhe ai në Champions po e bën vazhdimisht diferencën. Gjeorgjiani vendosi një rekord të bujshëm, duke parë kampionët që kanë dominuar vitet e fundit. Ai ka lënë gjurmë në shtatë ndeshjet e fundit të PSG-së, duke realizuar gol ose asist. E bëri në dy ndeshjet ndaj Bayern (gjysmëfinalet), në ato kundër Liverpool (çerekfinalet) dhe Chelsea (1/8-at), plus në kthimin e playoff-it me Monaco. Gola dhe asiste pa fund, dhe kundër rivalëve të nivelit më të lartë. Bilanci i tij total është 10 gola dhe 6 asistime në 15 ndeshje.
