Problemet në rrugën Qukës–Qafë Plloçë duket se nuk kanë të ndalur. Në lotin e dytë, pranë zonës së njohur si “Kthesa e Trebinjës”, janë shfaqur sërish dëmtime, këtë herë me ulje të dukshme të shtratit të rrugës.
Vetëm pak muaj më parë, rreth 500 metra më larg, një tjetër segment pësoi zhytje si pasojë e rrëshqitjeve të terrenit. Edhe ai nuk është rikuperuar plotësisht, ndërsa situata në tërësi paraqitet e përkeqësuar. Aktualisht, qarkullimi zhvillohet vetëm në një korsi, duke krijuar vështirësi për drejtuesit e mjeteve.
Kjo nuk është hera e parë që ky aks përballet me probleme. Që prej hapjes për qarkullim në shtator të vitit të kaluar, rruga ka shfaqur vazhdimisht defekte, të cilat u theksuan edhe më shumë gjatë reshjeve të nëntorit.
Me një kosto prej rreth 260 milionë euro, aksi Qukës–Qafë Plloçë vijon të jetë nën hijen e dëmtimeve të përsëritura, që tashmë po prekin jo vetëm lotin e tretë, por edhe segmentet e tjera të saj.
